Manat

Foto: Ilustrasi [Dokumen Pribadi]

Manat
Untuk cucuku

Ari pante sihpe ko berjelen
Ku teluk sihpe ko musergen
Turah tabi kin langit si ijujung
Lebih lues ari seringkel payung
Turah maaf kin bumi si i jejak
lebih lues ari seringkel tapak

Peri gelah berabun kata bermakna
kelam bersuluh remalan bertungket
Setiep buet I pikiri
Gelah jeroh ko bercerak enti serbak ko berperi
Salah gelah bertegah bahgie bertona

Munyuket kal wan tape berbuet kekire wan nate
Ike munangak ku atas i langit bintang tujuh
Tungkuk ku bumi kal pitu mata

Gelah susun mi sembilang belo
Gelah rempakmi lagu ere
Ulak turah bermanat
Ku cabang ton bersenggayun
Ku pante ton munawe

Kecalan jimet kin peringet
Modal seber wan nate
Ike geh berlewen ulak bersinen
Ku tete ton bergerdak
Ku lepo ton bergalak
Kin rerampe pembilesni porak
Penyidingni sire urum uren
Pelkoken ranting tene nge taring
Awinen cabang tene mutelang

Ike galak enti kin selpak
Ike mala enti kin rentak
Titipen pesan ku bantal nome
Parin amanat ku pucuk sesampe
Emas berpuro gere kin sebet
Kaya emas gere musampe
Kaya ate bewene ara

Ate mulie pangkal ajimet
Ike murip sembilang roda cerka
Pongot kedik peries ni donya
Porak sejuk tenironi masa

Ike nge sawah ku duduk ni tenge
Lupen enti kin si taringen
Enti janyi ubun kin lelon
Enti tulis kalam kin pemeram
Ike terempas ku pintu nyanya
Ingeti tuhen si bijaksana

Terangi akal kin pangkal percayai kekire kin belenye
Santiren budi ku atani kerlang
Temengen jasa kin modal juang
Bejei ate urum kasih sayang
Siremi jiwe urum petimang

Ike tingkis ulakan ku bide
Ike sesat ulakan ku dene
Bertimah lemut berbesi berani
Bersejuk tawarmi urum celala rime
Tangkoki murip urum kunci tabah
Bahgie munampi iserapni ranyo

I tilik belang sebelum I pancang
I timang uten sebelum I tene
Harapdi ate kenak ikenang
Enti osah mulingang ate ni heme
Harapdi ate kenak kin sayang
Enti peralai kuringni kule
Harapdi ate kenak kin puji
Enti muniri ku waih ni rume
Bertaburmi kasih urum bahgie
Jarakmi seteru selisih bele
Lempangmi jelen si male lalui
Tenangmi bade pinte ni perau
Terangmi bintang kin gantini suluh
Pena: M. Saleh Suhaidy
Banda Aceh, Medio Januari 2007

Rate this article!
Manat,5 / 5 ( 5votes )
author

Author: